2016-imi pisortanit soraarnerussutisiallit naatsumik allaaserinera
Saqqummersitami matumani aningaasat tunngaviusut malillugit pisortanit utoqqalinermi aammalu siusinaartumik soraarnerussutisiallit nassuiarneqarput.
Saqqummersitap ilusilersornera
Saqqummersitami 2012-imit 2016-imut utoqqalinermi aammalu siusinaartumik soraarnerussutisiallit qaammat decembarimi amerlassusaat naatsorsorneqarput.
Immikkoortut aappaanni utoqqalinermi aammalu siusinaartumik soraarnerussutisialinnut kisitsisit pingaarnersiorlugit naatsorsorneqarput. Immikkoortumilu Kisitsisaataasivimmi tabelit saqqummersitamut tunngasut aqqanillit assigiinngitsut eqikkarneqarput.
Kisitsisaataasivimmi tabelini pingaarnertut sammineqarput soraarnerussutisiallit suiaassusaat, ukiui aammalu sumi najugaqarneri. Aammattaaq pingaarnertut sammineqarput soraarnerussutisiallit kisimiittutut imaluunniit aappariittut pisartagaqarnersut, tassuunalu aningaasat tunngaviusut pisartakkat nammineq aapparisalluunniit isertitai malillugit ilanngaagaasarnersut aammalu soraarnerussutisialik ilanngariikkanik (kaasarfimmiunik) pisartagaqartuunersoq utoqqaat illuanni imaluunniit ullukkut unnuakkullu inissiisarfimmiinneq pissutigalugu.
Immikkoortut pingajuanni soraarnerussutisiallit ukiunut qaninnernut kingullernut sanilliullugit amerleriarnerat ikileriarnerallu sammineqarput. Immikkoortumi Kisitsisaataasivimmit tabelit marluk saqqummersitamut tunngasut kisitsisini tunngavigineqarput.
Immikkoortut sisamaanni pisortanit soraarnerussutisiat pillugit inatsit tunngaviusoq aammalu soraarnerussutisiaqartitsinissamut aalajangiinermi tunngavigineqartut pingaarnersiorneqarput. 2016-imi januaarip aallaqqaataani soraarnerussutisiat allanngortinneqarput. Aapparisap isertitai apeqqutaatinnagit kisianni nammineq saniatigooralugit isertitat apeqqutaatillugit soraarnerussutisiat tunngaviusumik annertussusilerneqarnerat allannguummi tassani pingaarnersaavoq. 2016-imi juulip aallaqqaataani soraarnerussutisiamut aaqqissuusseqqinneq atuutilerpoq. Siusinaartumik soraarnerussutisiallit sulisinnaassusaat ukiut tallimakkaarlugit nalilersorneqartalerpoq. Siusinaarluni soraarnerussutisiat inuup sulisinnaassusaa tunngavigalugu assigiinngitsunut pingasunut annertussusilerneqarpoq ima; soraarnerussutisiat annertuut, soraarnerussutisiat akunnattut, soraarnerussutisiat annikittut.
Naatsorsuutit kommunit naatsorsuuserisarfiannit, Naatsorsueqqissaartarfiup inunnut nalunaarsuiffianit aammalu 2016-imi immikkut pisortat akissarsialeriviannit nalunaarsuutit atorlugit pilersinneqarput. Immikkoortullu tallimaanni nalunaarsuutit tunngaviusut suliarineqarneri aammalu periaaseq nassuiarneqarput.
Saqqummersitaq ilanngussamik ilaqarpoq, tassani utoqqalinermi aammalu siusinaartumik soraarnerussutisiat aningaasat tunngaviusut malillugit akit ineriartornerat takutinneqarpoq.
Naatsorsuutinit allanit assigiinngissut
Naatsorsueqqissaartarfiup saqqummersitaani ’’2015-imi isumaginninnermut ikiorsiissutinik pisartut”-ni utoqqalinermi aammalu siusinaartumik soraarnerussutisiallit amerlassusaannut tunngasut kisitsisit saqqummersinneqartut allaanerupput. Assigiinngissut immikkoortut tallimaanni nalunaarsuutinut periutsimi takuneqarsinnaavoq. “2015-imi isumaginninnermut ikiorsiissutinik pisartut” saqqummersinneqassaarnikuuvoq, tassunga taarsiullugu “201X-imi pisortanit soraarnerussutisiallit”, “201X-imi utaqqiisaagallartumik isertitat taarsiissutaasunik ikiorsiissutit” aamma “201X-imi meeqqanut tapiissutinik pisartut” saqqummertalerput.
Kisitsisaataasivimmi
Kisitsisaataasivimmi kisitsisinik nammineq toqqakkanik aallertoqarsinnaavoq, uuttuutit soorlu najugaq, ikiorsiissut, ukiut, suiaassuseq, ukioq pineqartoq aammalu soraarnerussutisiat annertussusiisa katiternerisigut.